And in the comemoracion of seynt Poul, the laste day of Juyn, come prynce Herry, the sone of kyng Herry the forthe, to London, with moche peple of lordes and gentyles: and the kyng lay thanne at seynt Jones hous til the Soneday nest folwynge; and thanne he remeved to the bysshopes paleys of London, and lay there fro Satirday tyl Friday after; and thanne he remeved to Rotherhithe. And prynce Herry lay at the bysshoppes inne of Dorham, fro the seid day of his comynge to towne unto the Moneday nest after the feste of Septem fratrum. And thanne rood Thomas the kynges sone duke of Clarence, and with hym the duke of York, and Beauford thanne erle of Dorset, toward Hampton with a gret retenewe of peple: and on the Tuesday rood the erles brother of Oxenford, and on the Wednesday rood the erle of Oxonford; and they alle lay at Hampton, and aboden the wynde tyl on the Thorsday the firste day of August; the whiche Thorsday, Fryday, and Satyrday, they passed out of the haven the noumbre of xiiij schippes: and on the Soneday they were dreven inne ayeyne with the wynd: and after, on seynt Laurence even and seynt Laurens day, they arreved at Seynt Fasters, faste be Hogges in Normandye.